Häsch du schomal Autostopp gmacht?

Zwoo Fraue, di äint nööcher an Füfzge, di ander gli Sächzgi, gönd mitenand uf en Tippel. Im Tööstal, vo Baume uus. Di äint chunt vom Zürioberland, di ander usern Tuurtal. – En wunderschööne Herbschttag, äin, won ali Summerwërmi zämebhalten isch. Ali Hërbschtfarbe lüüchted us de Gëërte und im Holz usse. Alt Landeberg, s Chämmerli, Tambourinschlucht, dänn obsi, wyter uf de Guyer – Zällerwääg bis is Saland abe. Wie staats mit der Zyt? Di äint hät gmäint, si well mitem Sächsizuug im Tuurtal usse sy. Mitem iigrächnete Kafi inere schööne Konditorei z Baume wüüris dänn knapp. – Häsch du au scho emal Autostopp gmacht? mäint die Jünger zu der Eltere. Iich? näi äigetli niid. Ich au niid. Me chients ja emal probiere. S äint Maal hebet die der Arm use – dises Maal di ander. Hoffnigsloos. Wo s Dotzed verby isch, gänds es uuf. Wie die äirn blööd aalueged us ime Züber uus…

Niiir sind aidütig im lätzen Alter. Entweder ganz jung – oder ganz aalt. Blaso mio – allzäme mitenand. Mir chönd scho lauffe! De Zuug won e Stund spööter is Tuurtal use faart, langet au na. Es brüeled käi chlini Chind me dihäim. – De Kafi – und zläid na en Coupe – sind e rächts Trooschtpflaschter. Und für die dihäim en Baumer Flade.

Els Morf

Schreiben Sie einen Kommentar

Ihre E-Mail-Adresse wird nicht veröffentlicht. Erforderliche Felder sind mit * markiert.